L'isola di Ceylon
El vapor el costeja, dando el giro, l'isola de Ceylon che la se presenta belissima e tutta coperta de alte palme, datteri e cocco. Poche ore e no vedemo più gnente, altro che sielo e acqua. La solita vita per altri sinque giorni. Studiemo l'inglese, ghe demo qualche ociada a qualche carattere cinese, e via. Gavemo anca el nostro fotografo che el tira qualche fotografia; ma, poro can, nol saea che sul vapor ghe gera la stanza propria, o meio el Photo-room, e savio cossa ghe tocaa far? L'andava de note soto el me leto, e con quela lanterneta rossa comprada a Porto Said, el svilupaa quele fotografie che spero che ormai avarì viste. Poro can, el vegneva fora bagnà dal sudor come un punsin quando el vien fora dall'acqua, ma el ghe riusciva. Intanto la bela compagnia che gavevimo la se divertìa sul ponte a zugar al croquet - dala matina ala sera - i ne disturbava anca i nostri studii - a noaltri che ne gerimo cassai là in fondo o meio, de drio del vapor.
I fasea anca le loro orazion e i loro canti - i gaveva el ministro che de tanto en tanto el vegniva dala prima en seconda a catar le so pegore; e ala matina i lesea la loro bibbia e ala domenega i andaa tuti in prima a scoltar, no la messa, ma le ciacole del ministro - non so se dopo el ghe dava la S. Benedision. Noaltri invece disevimo la messa en cabina, ma la domenega, nel saloto da magnar o se volì, nel Dine-room e gavevimo do done inglesi che gera cattoliche e du omeni - paraltro da Colombo a Singapore gavevimo anca siè o sete indiani, parché dovì saer che da Colombo a Singapore ghe nè montà su piassè de 100. Paraltro, gnanca i protestanti no i ghe i avea tuti gnanca lori, parché en tempo dele so fonsioni ghe n'era un bel numaro che i restava a zugar e no i ghe dava gnente a Lutero e gnanca a Calvin.
L'era belo vedar i indiani, che i magnava quele spòcine, su un toco de foia che la fasea da piato e i magnava con le man, senza cuciar né gnente. E le done? le gavèa i anei nei diei dei piè, nel naso - e le se meteva el gesso sula facia, e tutti i pregava o meio i cantava le so orasion en indian a Budda, e ore e ore. Che mondo! gavemo dito. Quanta gente che ghè ancora da convertir! E quei lì i andava a Singapore, e de là i se inoltrava nell'India, e cissà fin dove, e cissà se gnanca ghe gera là un Missionario. Ah! la gaveva rason S. Teresina de dir che magari tutti i se fasesse Mìssionari! e ai Missionari la ghe voleva e la ghe vole ben, parché i porta le anime a Dio - e speremo che la ne ajuta anca noaltri a convertirghene bastanza, che gavemo da vederghene tanti e tanti salvi en Paradiso che dà gloria al Signore e che i ringrazia ci li ga salvai.
Un bei giorno, semo dopo mezogiorno, con un bel sol - el mar l'è calmo e tutto laora pulito - sentimo che sona la cuca; ma no quela solita, ma quela dell'allarme. Gestene mei, cossa ghe sarà? i corre sul ponte tutti - anca i marinari - anca le done e i preti e tutti i se mete indosso quel mestiero che se ciama salvagente. Anca noaltri femo altrettanto - intanto i marinari i mola i conduti dell'acqua - dal ponte de comando i mola dei foghetoni e castagnole - qualche marinar l'e là che el laora per metar una barca de salvatajo en acqua.
Ma cossa ghe zè? cossa vol dir? semo vissini a un naufrajo? S'à rotto qualcossa? eh! parché l'è acqua quella là zo; e la pele, l'è la pele! Tuti i se spaventa e in te el più belo i vien a dirne che bisognava far così se vegnesse un naufragio. Fioi de tenche! l'era un sperimento che i fasea, ecco tutto.
Ah! ma l'era belo dopo a sentir uno dei nostri, a farne scola de natazion! El ne dizea: Cascando en acqua, basta far el morto; mettarse colla pansa in su, tegnèr el fià - sbàttar una man - non aver paura, e no gh'è pericolo. Caro lù, ghe disevimo noaltri, cossa volo mai, con ste onde? con quei pescetoni che corre drio? colle robe che se ga entorno? e po', anca, senza robe, dove andaresselo che no se vede terra gnanca se el pianse? Caro lù; mi, par conto mio la fasso come fìnìa, dove casco ghe resto. Ah! el fasso el morto, sì - e mi, disea quell'altro, mi digo che stofego anca i pesci, dalla paura! No, no, el continuàa, el primo - no gh'è d'averghe paura! - (e dir che tri minuti prima l'era bianco solo vedendose quel sachetto sul stomego e sula gobba, e sì, che se fazeva a posta!?) No, no cari tiremo drito, che l'è meio; e no stemo discorar de sti scherzi! Meio andar a pian, ma bagnarse le pupule, gnente. E intanto che ciacolèmo semo arivai a Singapore.
