Le coste dell'Arabia

Anderno inansi e finalmente perdemo de vista la sponda Africana e costejemo l'araba. Gavemo podù vedar molto ben quel monte dove Domenedìo l'à fato quela leje che dosea indrizzarghe la testa a tanta gente e che se ciama Monte Sinai, e ne pareva  de vedar Mosè che el vegneva zo con quei du corni de luse, mentre soto en te la pianura, (e avemo visto anca quela) ghe gera el popolo che adorava el vedel de oro, ma questo non gavemo podù vedarlo. La conclusion l'è sta quela de ringraziar el Signore che el sa degnà de darne i so santi Comandamenti e pregarLo che nol permetta mai che podemo trasgredirli, se volemo el Paradiso. Gavemo visto Gidda, città dove l'è andà Maometto quando l’è partì da quela casetta che v'ho dito - ma non gavemo podù vedar la Mecca, endoe l'è scapà - parché l'era massa endentro. E passando tra isole e isolette semo arivai a Rab el Mandeb e Aden, piccola città piena de forti, dove ghe gè anca un cantier per riparazioni dei vapori quando i fusse strachi dal viajo o roti, e dei grandi depositi de petrolio. Essendo che el nostro Kashima l'era miga straco e en bona salute semo andai inansi.

    Avemo trovà dei bei e grandi vapori che i vegneva da lontan, la magior parte inglesi; ma ghe navemo trova uno anca che el gaveva una bandiera tricolore, e guardandome intorno ho visto uno dei me compagni che el gaveva i oci lustri.

Cossa credìo? l'amor di patria l'è santo anca lu; e trovandose lontani, in viajo per posti sempre più lontani, vedendo un segnalsigno de la cara patria, i oci i se inumidisce e quasi se potola; ma l'amore  ale anime, far da Missionarii per salvar anime al Signore, l'è più forte e el fa vinsere tutti i sacrileii, e el ne facilita l'entrada in Paradiso. Saludemolo donca anca quel vapor, auguremoghe bon viajo e tiremo inanzi. Guarda, guarda che bela isoleta! (Persa in mezzo al mar, la gavarà 100 metri de longo per 50 de largo - eppure anca lì ghè gente, e che la vive sacrificada pel ben de tuti, parché l'impissa el faro che l'insegna a tutti che lì ghè del duro. Che servizio quello del faro?! Ale volte, quasi a fìor d'acqua, in mezzo al mar, vien fora una piera: guai se un vapor el ghe sbate drento! ghè del duro - se spaca tuto e se va a fondo - e alora? Ecco che i trova una persona de sacrifizio, che se rassegna a star lì en te na casetta, in mezzo al mar, e che la impizza el faro de notte: e questo ora el se mostra ora el se sconde cola so luce, el struca de ocio insomma, e i capitani del vapor i lo vede e i ghe passa lontan e così jè salvi. Elo miga un bel favor? Ah, mi go dito un'Ave Maria a quele poare creature, e che el Signor li benedissa, e se jè pagani che i possa farse cristiani catolisi e andar anca lori in Paradiso - là ghè dei bei fari eh?! che se smorsa mai - specialmente el Signor che l'è el faro del mondo tuto e specialmente del Paradiso.

      Gavemo avù fin adesso dei boni compagni de viajo, che no i ne abandonava mai, e i gera i gabiani che i seguiva el vapor finché non gerimo tanto tanto lontani da terra - ma adesso che gavemo ciapà proprio el largo e non se vede più terra, jè scomparsi anca i gabiani - e solo i tornemo a vedare un poco, vissin all'isola de Tamarida e Socotra e dopo basta ancora fin che se ariva ale Indie Britanniche e propriamente a Colombo - ma gavemo dela luganega ancora fin là, ghe manca ancora 9 giorni. Non pensemo più a gnente e continuemo col nostro inglese che el par che el voja scominsiar a farse capir. Passemo come el solito anca sti nove giorni, quasi senza novità, se no contemo quei bei pesci grossi e longhi che i vegniva acompagnando el vapor e che i ghe dise delfini - se  no contemo qualche vapor che incontraimo, che i vegneva de fronte, de traerso e che i andava insoma par i fati soi. La nostra atension l'è sta ciapà un giorno da na bela isoleta in mezo al mar. Piccola con un bel cason en sima, na montagneta col so brao faro e anca là una fameja. Sta montagneta la gà dele bone piere, dele ponte - la gà anca una stradela par andar su, e là su se vedeva una piazzeta con un muro - par dir la verità non se vedeva olivi e gnanca vigne - ma la ghe someiava en tuto a un'altra posizion che go visto en Italia e che a mi la m'à piasso - non così a qualche altro. E ghè sta uno che strucandome l'ocio el m'à dito: Ciò, varda che bel posto par serti frati! Mi go dito: Tasi che no i se rabia. Eh, el dise lu, qua no i gavaria che da pregar e studiar - mar, no ghe ne mancarea e gnanca montagna, e i sarea un poco lontan ancora dai altri.

     Vardè che lengue! Scometo che quel là el conosce qualcossa, o meio el conosse omeni e cose, o meio el sarà sta soldà. Ben ben, tiremo innanzi che me par che là in fondo se veda qualcossa. Cosa elo? Colombo, Colombo. Ma no Cristoforo Colombo quel dala Merica, l'è la cità de Colombo, capitale dela penisola, anzi dela isola de Ceylon. Finalmente ghe arivemo. Lì cari, jè proprio indiani - e i se sente come indiani, cioè na strassa che la va dai fianchi fin ai zenoci - e dai fianchi in su, gnente - un turbante in testa e shciao... Piante belissime de datteri, de thè e altre - un caldo can, eco parché  i  va mezo nudi. El porto l'è belo, ghè dei vapori fermi - la pì gran parte inglesi, e ghe n'è uno anca dell'Italia - dela compagnia triestina, ma l'è pitosto bruto e ghe zugarea che el s'a stracà. La città la se presenta ben e volemo vedarla. Smontemo, ma prima bisogna che se intendemo coi inglesi, parché qui i comanda lori. Fora donca i passaporti coi nostri sciafài. Ghe gera là un bel tipo - lustro che el parea onto col butier - el ne guarda, el guarda el sciafai che ghè sul passaporto, e1 vede che semo proprio noantri tali et quali e el ne lassa passar - andemo e podemo sbarcar par vedar la città. Sta olta andemo zo, senza pagar.

    Bele strade, tute smaltae de catrame - bei palassi e bellissime piante. Anca quà ghè quei che tira el caretin e che i trota come puleri. Andemo a comprar qualche cartolina, un pochi de boli; e quà la n'à servìo quela shcianta de inglese che gavevimo imparà en viajo. Dopo compremo anca na tonega ligiera ligiera par el caldo en viajo, che l'è pitosto abastanza - pensè che semo visin al equator che no scherza miga e se ve incantè el ve brusa. Sta tonega l'è bela e de diversi colori - no so se dirve che la ghe someia a na tonesela; pecà che sula schena la gà la musa de un bruto uselasso, de un dragon - paremo tanti archimandriti. Catemo po dopo un indian che el parlava anca un poco de francese, de spagnol e qualche parola de talian - se semo intesi benon in tute ste lingue, ma no semo intesi poco poco en quanto al resto. - Dovì saver che gavevimo voja de bear un goto de qualcossa. No stè miga scandolesarve. Pensè che anca a Colombo noaltri gerimo italiani, e in Italia un gosso de vin i le bee anca i frati. Noaltri invece non l'avemo visto mai, altro che a Porto Said e dopo basta fin ancò. E cossa credio? no l'avemo visto gnanca a Colombo. Quel bel tomo el n'à dito: Venez avec moi. E noaltri drioghe a quel moi, e camina che te camina con un caldo da stofegarse. Finalmente ghe domandemo: Dove ne menelo sior? E lu el dise: Ici ici, l'è bon e tanto. Ben  andemo. Insomma per farla curta, gavaremo caminà più de mez'ora per andar a finir su per dele scale de legno en te un buso scuro dove i n'à mostrà del vin che el se ciamava 30 franchi ala botiglia. Ne semo spaventai. E alora avemo capì che saria sta un ato de virtù e una mortificazion a non bearlo, o meio avemo capì che non l'era mauro, come quela tal dall'ua, e semo contentai de do bottigliette de bira - la costaa poco, ma la valea anca poco: la parea acqua de peri marsi. Semo venudi zo subito e gavemo capì che come ne gerimo stacai da tuto par farne frati, da tuto par andar en Cina, el Signore el volea che desmentegassimo anca el vin - e noaltri pronti, non l'avemo più visto. Credio che ne fossimo spaventai per questo? Ah! no no - i Missionairi i guarda piassè in alto e no i ghe bada a ste miserie! Un pochetin strachetti, semo tornai sul vapor, e dopo dite le nostre brae orazion semo andai a dormir. Sul vapor peraltro gavemo trovà dei indiani che i ne vegniva vissini e i ne mostrava la medaia che i gaveva tacà al colo e con el segno de Crose i ne mostrava che i gera cattolici. I ne contava che i gera stai fati cristiani dai francescani - che ghe gera dele cese anca in Colombo, ecc. ecc. e se capisse, tutto en inglese! e noaltri, imagineve se non capivimo. I avemo lascià che i continuasse a laorar e semo andai a dormir. El giorno dopo verso mezogiorno partenza per Singapore.