Il canale di Suez

Ala matina col sole gavemo podù vedare dei bei palassi, specialmente quelo dela Compagnia del Canale di Suez - dele statue - gente de tuti i colori e vestidi in tute le maniere piassè strane - mostri che se butava dala barca nel fondo del mar par catare i schei che i ghe butava zo; uno po, l’è vegnù sul vapore e dal ponte più alto el sa butà in acqua per ciapare una palanca e dopo l’è nodà via come se el fusse un pesce. Gavemo visto nela piazza quei che fa da cavai. Digo cossita parché invese de essarghe carosse o auto, ghè dei piccoli barossini tiradi da un omo che el se mete ala corsa come un puledro e el mena la gente, che pacifica l’è sentà nel barossin: i ga corajo de continuar a corar per ore e ore e per kilometri e kilometri sensa stracarse. Quando gè stade le 8 semo partii per dentro al canal e per continuare la nostra strada. El canal! Che roba bela! L’è  finì da pochi ani, almanco en maniera che se pol passar - parché finì del tuto nol d’è gnancora, el ga le sponde da finir e bisogna che i continua a netarlo. L’è longo 150 kilometri e largo 40 metri, tanto che du vapori no i pol passar insieme - bisogna che uno se ferma finché quel’altro passa, e per questo ghè dei posti dove i ga slargà un poco de più, e là el se ferma uno fin che l’altro passa. El vapor el va pian pianin, parché el canal l’è pien de storte e ghè poca acqua e cossita se ghe mete 16 ore a passarlo. Se ga tempo de vedare tante bele cose e anca brute. Par esempio la poara gente che laora e che i ga de quele case che jera peso dele nostre stale. Quatro pali, un poche de foje e shciao. Alla nostra destra gavevimo l'Egito, dove non se vede che sabbia e sabbia senza un pelo de erba - grandi paludi formade dal Nilo - se vede dei mussi e dei camei che i aspetta en zenoccio el paron - i cami in zenoccio, savio, no i mussi - ala sinistra ghe gè l'Asia o, meio la Penisola del Sinai - anca lì sabia e sabia e gnanca un pelo de erba, na desolazion.

Se trova de tanto en tanto dei vapori che vien, e alora uno se ferma e l'altro passa e dopo, avanti. Ghe gente che pesca, che lavora; se vede qualche contrada tutta de case de fango, roba da far pietà. L'è sta bela, vèdare un poro can de papà, che sula barca col so fioletto, el se taca con na soga al nostro vapor, per viajar più in pressia e andar più lontan a pescar. El lo vede uno dei nostri marinari giaponesi e el ghe dise de smolarse. Lu nol ghe bada e el continua tacà - el marinar el fa finta de tajarghe la soga, ma lu nol ghe bada e el so fioletto el guardava in su con  du ocieti da far compassione. Se el lassava la soga, bisognava che el remasse e così invense l'andava più in pressia e senza fadiga - el marinar, quel senza cor, el ghe buta zo un secio de acqua, e quell'altro el la ciapa e el continua tacà - finalmente el marinaro el ghe mola la soga ala quale el se gera tacà cola sua el pescador, e alora l'è restà indrio e l'avemo visto a laorar de remi par andar avanti un poco. Poareto! magari el gaveva fame, e cissà dove el dovea andar! Cossa gavevelo paura el marinar, che el fermasse el Vapor cola barchetta? la pareva un sgusso de nosa! El m'a fatto rabbia e non so cosa gavarea dito.

Camina che te camina vien la sera - gavemo visto prima una scola, dopo un sanatorio su na colineta, dove ghe gera anca una moneghetta de quele dal capelon bianco. Ma la roba che n'a fatto impression l'è sta questa. E ve digo subito che se el 16 Novembre dell’83 non fusse nato un succòn ma un poeta, saria proprio da farla una poesia de quele bele. Ghe gera su n'altura de sabbia e con davanti do altissime palme, una moschea. L'era quasi scuro, e sul so camel, andava su un musulmano: arivà davanti ala moschea, el camel el se ensenocia e smonta el musulmano, che ligà la bestia a una dele palme, con tuto el so rispeto el va drento e el scominsia la so preghiera. Chissà da quale distanza el vegneva! mi jò visti ancora de quei che viaggiava du tre giorni per vegner a compir la so promessa davanti al Santo de la so divozion - e quel là magari el caminava, cissà da quanti giorni atraverso el deserto, per venir a pregare Maometto e domandarghe cissà che grazia! Avaressimo volù fermarne e istruirlo un poco, e dirghe che se quella fadiga che el fasea per Maometto el la avesse fatta per Domine Dio, el sarea andà drito en Paradiso - ma, come se fa? magari, cissà, cola so bona fede el podarà anca lu salvarse. Quanta  ignoranza, quanta miseria che ghè! El camel entanto, sempre in genocio l'aspetava el padron. Finalmente avemo perso tutto de vista - male mal, gavemo visto quela che i dise sia sta la casa de Maometto e da dove el sarea partì par andar a Gidda e ala Mecca - e a mezzanotte siamo arrivai  a Suez, che no ve digo come l'è fatto parché no se vedeva niente.

El Kashima el sa fermà fin che i ga tirà via un toco de coa che i gaveva messo perché el fosse più obbediente nel Canal, i ga smorzà i lumi davanti che de note el doperava come un automobile durante el percorso del Canal, e poco dopo semo andai avanti. Quando ne semo svejai geriano proprio nel posto dove Faraon con i so soldadi l'à fato quela bela figura. Gavemo guardà se ghe ne vedevimo qualche dun de quei soldadi, ma i ne ga dito che i gera soto che i fazeva colazion. Erimo nel Mar Rosso. No ste miga credar che el gabia l'acqua rossa, savio: i lo ciama così parché le so rive jè de piera che l'è quasi rossa specialmente al nascer del Sol, e noaltri le avemo viste proprio in quel'ora e gera come rosse.