Voja de partir

Tanta l’era la voja de partir e arivar al posto che el Signor el na ea ispirà, che se qualcheduno el naesse dito de andar a pian, l’avaressimo ciapà pel colo. Vèdare che pressia, che ansia fin soto la tetoja de la Stassion de Roma.

«Nemo, nemo che se nò perdemo el vapor. Quel là no l’aspeta gnissuni. El parte doman matina!»

E cori che te cori e arivemo a Napoli. Partito? Seih! Non l’è gnancora rivà da Marsilia, e po dopo, bisogna che ’l speta un giorno en Porto!? E alora? Ben vedaremo.

Cossita diseimo o parlaimo el 29 novembre passà (1925). S’informeremo mejo - el tal “Kashima Maru” el vien doman, parché l’à trova el mar cativo e l’andarà via dopo doman: e alora? Intanto gera vegnù anca el Vicario del Superior, a Napoli, par darne l’ultima benedision e anca là l’à dovù spetar. Nasemo allora en te na cesa dove che gera toaje sporche, careghe en desordene e tutto sporco e en desordene; du sacrestani cola bareta en testa e che non jè sta mai boni de parar ìa un bel surianelo che el m’à compagnà tutto el tempo de la me Messa, e fin nel’ora dela Comunion a na vecieta, lè saltà sula balaustra par vedare. Ma ga pensà don Caimi che nel dire: Et Verbum caro factum est, all’ultimo Vangelo, el ga petà la ponta de na scarpa sul muso, e cossita sgnaolando lè scapà ia.

Finido tuto pensemo d’enganar le ultime ore che doveimo passar sul bel molo talian, e gaemo pensà de andar a vedare le solfatare a Possuoli. Ciapemo el tram eletrico, e via. E, vardè come jè le cose!  Nè vegnù anca fame!

Andemo, serchemo, e finalmente se riunimo tutti en te na tratoria en ria al mar, dove i disea che i fasea tuto a esprèss. Che belessa! Dopo mez’ora de star sentai senza vedar gnissuni, ven un tal Vicente; el se ciamava serto cossita parché la tratoria la se ciamava «Vicente em copa o mare» donca non se dubita pi’.

“Cossa desideràeli? - Spaghetti?” -  Sì, sì, vaga per i spaghetti, e uno l’a volù la supa cole gondole! Pronti, tutto all’esprèss!...

Tri quarti d’ora dopo, capita la supa per un. Un sbroicio con seole e meza dozena de ostreghe. Roba catìa, e no so de che gusto; ma ci l’à magnà anca se el fasea le boche, l’a dovù dir che l’era bona, e el l’à magnà. Un quarto d’ora dopo capita i spaghetti all’esprèss. I sarà stai 24, tuti sbrodolai de pomodoro - no i gavemo gnanca visti, - e prima che vegnesse la costoletta de porco, vecia e stravecia, ne serimo anca desmentegai de cossa gavevimo magnà prima. Immagineve che jè vegnui dopo mez’ora! Gavemo mandà al limbo i spagheti, la costoleta e anca l’espresso, e pagà i 60 franchetti, semo andai via cola fame e cola rabia del bel disnareto, che el dovea essare quel de adio.

Visitada una solfatara tornemo a Napoli, e gnanca a farlo a posta, en tel desmontar dal treno ghè uno che el vol battar bocca con D. Fantozzi e tra le altre el ghe dise: “alà che saemo che i preti i magna ben, v’avemo ingrassà anca massa!” - Fiol d’una scuria, proprio in quel giorno! A gaea na fame! Se el sento mi, ghe dava un cresemoto a quel moscardin che lo fazea andar da Vicente en copa o mare; ma cossita l’è sta mejo, alà - bisogna perdonare e shciaio - paraltro quei siori, i podarea tegner un pochetin piassè neta la Casa de Dio, e no tegner drento i gati - e quell’altro, che el vaga pura a pian, ma che el ghe daga da magnar ala zente, spezialmente quando i paga salà - e che el se tegna el so esprèss.