Invito a sostenere la missione cinese
e conclusione
Semo andai anca a riverire l'Eccell.mo Ministro d'Italia che el n'ha anca convidai a disnar a casa sua, e là gerimo contenti parché ne pareva de essar in Italia - e gh'è anca i so bravi soldà, che jè un destaccamento del Battaglion S. Marco che l'è a Tientsin. El Ministro el ne li ga presentai proprio in linea come se farèa a un general - l'ha dito dele bele parole e bone a quei soldadi - mostrando che come lori i gera vegnudi dall'Italia per compir el loro dover, cossita noaltri gerimo vegnudi per un altro dover molto più alto e necessario, cioè predicar la dotrina de Gesù Cristo e convertir i pagani - noaltri che avaressimo podù, el diseva lu, star a casa nostra a goderne la pace e la bona vita dela patria! - e el ga raccomandà de essar anca lori sempre pronti al dover, e el ga ricordasto el dover che l'è quelo de far rispetar i trattati che i cinesi i ga firmà, e difendere le Missioni italiane - l'ha fatto, po dopo, un reciamo spezial al nostro capitàn che l'era lì anca lù presente cole sicatrise, no dele buganze, ma dele feride de guerra - e el ga dimostrà come du e du quatro, che se l'è ancora vivo, l'è parché no i lo ga mazzà, che da resto no ghe mancava tanto - che insoma l'ha fato pulito e el ga ciapà la so brava medaia! E me parea de vedare qualche d'un de quei giovanotti a strangossar e a dir tra de lori: Ol dun can, elo sta gnanca brao!?!
E el nostro capitano l'ha anca risposto ale parole del Ministro, e anca pulito - e el ga dito ai soldadi che quel che lui l'ha fato in guerra el l'ha fatto per compier un santo dover, e che come alora el ga combatùo contro el nemigo, adesso con piassè corajo ancora el combatteva contro el diavolo che ga soggette tante anime - dover anca questo da doverse compier da un Missionario bon - e che nel compier el dover sta tuta la nostra obligazion. Che i fasesse pulito anca lori che cossita la patria e Domenedio i sarìa sta ben contenti. Cossita me par che el gabia dito, po' su, po' zo. - Gavemo visto là anca un Missionario de quei de Parma che l'è adetto alla Legazion italiana e, po dopo, semo vegnudi via atraversando in città una bela strada larga ciamada Via Italia - scritta sule tabele in grande e ciaro, proprio en mezo a Pekin. E l'è con questo che voio far punto fermo. Vegnarà, mi penso, altre ocasione da doverve scriver e mandarve notizie - per intanto lassè che tira qualche conclusion e prima de tuto che dichiara anca a nome de tuti: che quà semo per sola volontà de far del ben, a ste poare creature - che per questo, gnente ne importa qualunque saicrifizio fatto in Italia, en viajo - quà adesso, presentemente e anca in futuro, sia pure e magari! quello della vita - che, visto come per arivar fin quà gh'è volù bastanza, e gavemo patì, anca dal lato dela lengua, mi voria dirghe a quei che gavesse la ciamada dal Signor de vegner quà, che i se preparasse fìn da piccoli ai sacrifizii - a non essar massa sputacini delicati, a farse bon stomego e bona boca - a studiar a studiar molto le lengue necessarie nele nostre Missione, e se no i pol el cinese, almanco l'inglese - vojo anca dirghe a quei che no gavesse sta ciamada, che i aiuta cole orazione per noaltri e per tutti i Missionarii parché i gh'à un bisogno stragrando e sempre - e anca par sta pora gente cinese, parché la possa convertirse e amar Domenedio - finalmemte, che questa mia la gà specialmente l'idea de ricrear e animar i nostri cari aspiranti e persiò l'è scrita en dialetto veronese dove paraltro se garantisce la verità nuda e cruda de tutto quel che gh'è dito - e essendoché, scherzando sì, ma proprio giustamente la riferisce la cronaca della nostra fondazion cinese, me pararea che la notizia per i nostri futuri, la meriti de essar almanco unita al giornal «La Rama» in qualche canton dell'archivio stimatin.
Spero che un «Ave Maria» special la sarà per quel che l'ha scritta.
Visto: per la verità
Pekino, 25 Febbraio 1926.
D. Enrico Adami Missionario
D. Luigi Fantozzi
D. Tarcisio Martina
j'è tute vere!
D. Angelo Caimi
A conferma di quanto sopra
