Hong-Kong - Visita alla tomba della sorella Letizia

    La matina dopo, a bon'ora, mi vago dale moneghe e quell'altro en Catedral a dir Messa - dopo se catemo dale Moneghe tutti do e visitemo la casa. Prima de tuto la capella, dove ho dito Messa e dove la me povara sorela la s'à comunicà tante olte e l'ha pregà per mi - visitemo e femo fotografie dela camara e letto dove l'è morta - fotografemo una parte del Collejo che l'è bellissimo e immenso - il più belo che ghe sia a Hong-Kong - porto via  qualche  ricordo  de me  pora sorela, e andemo a visitare i Missionari - bevemo el cafè - ciacolemo un poco - visitemo la Catedrale che da du anni l'è senza Vescovo - e po dopo decidemo de andar al Cimitero - dove ne compagna anca el Superior. Mi voleva vedere se almanco l'era ben tegnù la tomba de me sorela - voleva dirghe un Requie e, se fosse possibile, lassarghe piantà un fìor. Arrivemo al Cimitero Cattolico che l'è in mezzo fra quel maomettan e protestante - catemo lì vissin anca un altro Missionario, el P. Enrico Valtorta - entremo - preghemo tutti sulla tomba de mia sorella - tiro qualche fotografia, che certamente sarà un regalo per i me pori veci; ghe disèmo un Requie a tutti quei poarini che jè là in quel Cimitero - e andemo a visitar la Cesa del P. Valtorta, che l'è de cemento, ma bela e graziosa e consacrada al S. Cuore. Ciapèmo el tram e tornemo indrio - arrivadi dai Missionarii, i saludemo e shciao.

     No me par sia el posto de dirve come stava mi, ma ve lo immaginarè. L'è vera che me sorela l'era proprio bona - la l'ha dito anca la Superiora, ma el sangue non l'è miga acqua e el cor no l'è miga una patata. Dunque pardoneme, e vegnime drio parché mi torno sul vapor che a mezzo giorno, l’ha dito che el vol andar via per Shang-hai. Gè tri giorni e mezo soli, e po dopo avremo quasi finì el nostro viajo, ma bisogna che i femo anca questi. Corajo donca, e avanti. Stavolta el Kashima l'è stado proprio puntuale, e a mezogiorno in punto, el parte ala volta de Shang-hai. Dopo do ore se trovemo in pieno Mar Paciflico. Ma mi sottoscrivo subito parché i ghe cambia nome. Pacifico quel fiol d'una tenca?! Ah, se avessi visto che salti! rabbioso bisogna metarghe nome, no pacifico. El par impossibile che sta gente la se goda metarghe nomi roversi a serte cose! Pazienza ancora dei Romani, che i ghe ciama acqua marsa a un'acqueta che l'è così bona! pazienza de quei che i dise che el tal l'ha fato un bel salto parché el s'à spacà la testa; ma, cossa ocorea ciamar pacifico un mar, che non l'è pacifico mai; gnanca un momento - che nol se pacifica gnanca se lo preghè in zenocio! insomma, mi gavarea paura de vedar ancora quell'altro, ciapar in pressia la pignatina e correr su e su fin che el bufava su - invece l'ha tegnù duro e el s'è contentà de un poco de mal de testa. E quela tarantella l'è durà fin al terzo giorno quando dovevimo arivar a Shang-hai. E alora el s'è quietà; ma volìo saver el perché? L'è mezanotte. Mi me sveio e sento che el vapor l'è fermo. Ciamo quei altri, e se domandemo cossa sia successo. Guardo fora dal finestrin e vedo lì vissin un altro vapor. Che sia i pirati? eh! no gh'è gnente da ridare; i n'avea giusto contà che in sti tempi de tòrbolo, poche setimane prima i pirati i gaveva ciapà un vapor che l’era drio andar a Tientsin e i l'ha fato tornar indrio fin a Hong-Kong, fazendoghene dopo quel che i volea lori! Che sia qualche ispeziòn, o proibizion de andar inanzi, adesso che gh'è rivoluzion in Cina? Nessun sa gnente. Me infilo le braghe e, se anca che ghe ze un fredo can, vago su a domandarghe a qualche d'un cossa è successo e parché non se va inanzi. Dito fato. Trovo un marinar e ghe domando. Savio cossa el m’à dito? Volìo saver parché non andavimo avanti? Parché - ma jè robe da non credar gnanca! Parché, seanca gerimo in mar, non ghe gera acqua. Acqua, ghe n'era - ma l'era poca - erimo nella bassa marèa, e el vapor nol podea andar avanti. Vardè voaltri?! mancar l'acqua en mar! eh! ma se l'è mancà, l'è parché prima ghe n'era - dove no ghe n'è; non ghe ne pol mancar - ve par? vol dir alora che la tornarà. Ala matina intanto, vedemo intorno a noaltri, e tutti vissini, altri otto o diese vapori che i gaveva avù la stessa sorte. Cossa volìo. Gerimo vissini a Shang-hai, e Shang-hai l'è all’altezza del mar e tutta risàre - se ghe arriva senza vedarla, altro che quando già se gh'è - una shcianta de bassa marea, e se se arriva in quell'ora, no se va più innanzi. Insomma per farla curta, semo stadi fermi 10 ore e mezza, e dopo pian pianin navegando come se fosse nel fango, semo andai avanti.